എൽ ക്ലാസിക്കോയിൽ റയൽ;പോയിന്റ് ടേബിളിൽ ഒന്നാമതെത്തി റയൽ മാഡ്രിഡ്

എൽ ക്ലാസിക്കോയിൽ റയൽ മാഡ്രിഡിന് സ്വന്തം കാണികളുടെ മുന്നിൽ വിജയം.എതിരില്ലാത്ത രണ്ട് ഗോളിനാണ് റയലിന്റെ വിജയം.റയലിനായി ഗോൾ നേടിയത് വിനീഷ്യസ് ജൂനിയർ,മരിയാനോ എന്നിവരാണ്.ജയത്തോടു കൂടി 56 പോയിന്റുമായി ടേബിളിൽ ഒന്നാം സ്ഥാനത്തേയ്ക്ക് റയൽ തിരിച്ചെത്തി.ബാഴ്‌സ 55 പോയിന്റുമായി തൊട്ടടുത്ത് തന്നെ ഉണ്ട്.

 

 

മത്സരത്തിന്റെ ആദ്യ പകുതിയിൽ കളി ബാഴ്‌സയുടെ കൈയിലായിരുന്നു.മത്സരത്തിൽ എല്ലാ മേഖലകളിലും ആധിപത്യം സ്ഥാപിച്ചായിരുന്നു ബാഴ്‌സയുടെ കളി.ഒരു പ്രോപ്പർ സ്‌ട്രൈക്കറുടെ അഭാവം ബാഴ്‌സയെ അലട്ടുന്നുണ്ടെന്ന് കളിയിൽ നിന്നും വ്യക്തമാണ്.ഗ്രീസ്‌മാൻ,ലയണൽ മെസ്സി എന്നിവർ കിട്ടിയ അവസരങ്ങൾ തുലച്ചതും ബാഴ്‌സയ്ക്ക് തിരിച്ചടിയായി.എന്നാൽ രണ്ടാം പകുതിയിൽ സിദാന്റെ റയൽ മാഡ്രിഡിന്റെ അക്രമണ കളിയായിരുന്നു കണ്ടത്.ബാഴ്‌സ താരങ്ങളുടെ മിസ്സ് പാസ്സുകളും കൂടി ആയതോടെ കളിയിൽ റയലിന്റെ പിടി മുറുകി.71 ആം മിനുട്ടിൽ ടോണി ക്രൂസിന്റെ അസിസ്റ്റിൽ വിനീഷ്യസ് റയലിന് വേണ്ടി ആദ്യ ഗോൾ നേടി.എക്സ്ട്രാ ടൈമിൽ ബെൻസിമയ്ക്കു പകരക്കാരനായി വന്ന മരിയാനോ രണ്ടാം ഗോൾ കൂടി നേടിയതോടെ ബാഴ്‌സയുടെ പതനം പൂർണം.