ഇറ്റാലിയൻ സെരി എയിൽ റോമക്ക് തിരിച്ചടി
ഇറ്റാലിയൻ സെരി എയിൽ എ.എസ്.റോമയ്ക്ക് തിരിച്ചടി. ഇന്നലെ നടന്ന മത്സരത്തിൽ അറ്റലാന്റയോടാണ് റോമ പരാജയപ്പെട്ടത്. സെരി എയിൽ റോമയുടെ തുടർച്ചയായ മൂന്നാം തോൽവിയാണ് ഇത്.
അറ്റലാന്റയുടെ മൈതാനത്തു നടന്ന മത്സരത്തിൽ ഒന്നിനെതിരെ രണ്ട് ഗോളുകൾക്കായിരുന്നു റോമയുടെ പരാജയം. ബോസ്നിയൻ താരം എഡിൻ സെക്കോയുടെ ഗോളിൽ റോമയാണ് ആദ്യം ലീഡെടുത്തത്. എന്നാൽ പിന്നീട് ഹോസെ പലോമിനോ, മരിയോ പസാലിച്ച് എന്നിവർ നേടിയ ഗോളുകളുടെ ബലത്തിൽ അറ്റലാന്റെ തിരിച്ചടിക്കുകയായിരുന്നു.
വിജയത്തോടെ നാലാം സ്ഥാനത്തുള്ള അറ്റലാന്റയ്ക്ക് അഞ്ചാമതുള്ള റോമയേക്കാൾ ആറ് പോയിന്റ് ലീഡ് കണ്ടെത്താനായി. ഇതോടെ ടോപ് ഫോറിൽ ഫിനിഷ് ചെയ്ത് ചാമ്പ്യൻസ് ലീഗിലേക്ക് തിരിച്ചെത്താമെന്നുള്ള റോമയുടെ പ്രതീക്ഷകൾ തകരുകയാണ്.
