ഈസ്റ്റ് ബംഗാളിനെതിരായ രണ്ടാം മത്സരം ഇന്ന് : അഡ്രിയാൻ ലൂണ ഇന്ന് കളിക്കില്ല
കൊച്ചി ജവഹർലാൽ നെഹ്‌റു സ്റ്റേഡിയത്തിൽ ഈസ്റ്റ് ബംഗാളിനെതിരായ ഞായറാഴ്ച നടക്കുന്ന മത്സരത്തിൽ കേരള ബ്ലാസ്റ്റേഴ്സിനായി അഡ്രിയാൻ ലൂണ കളത്തിലിറങ്ങില്ലെന്ന് മുഖ്യ പരിശീലകൻ മൈക്കൽ സ്റ്റാറെ. മത്സരത്തിന് മുന്നോടിയായി നടന്ന പത്രസമ്മേളനത്തിലാണ് താരം മത്സരത്തിന് ലഭ്യമല്ലെന്ന വിവരം അദ്ദേഹം അറിയിച്ചത്.
തൃപ്തികരമല്ലാത്ത ആരോഗ്യനിലയെ തുടർന്ന് പഞ്ചാബ് എഫ്‌സിക്കെതിരെയുള്ള ലീഗിലെ ആദ്യ മത്സരത്തിലും നിലവിലെ ക്ലബ്ബിന്റെ ക്യാപ്റ്റൻ ലൂണക്ക് ഇറങ്ങാൻ സാധിച്ചിരുന്നില്ല. ” ഞാൻ വരുന്നതിന് തൊട്ടുമുമ്പ് അദ്ദേഹത്തോട് (ലൂണ) സംസാരിച്ചു. ഇതുവരെ പൂർണ്ണമായി സുഖം പ്രാപിച്ചിട്ടില്ല. അതിനാൽ കളിക്കില്ല. നിങ്ങൾക്ക് ഉടൻ അദ്ദേത്തെ കാണാൻ കഴിയുമെന്ന് പ്രതീക്ഷിക്കുന്നു. പക്ഷെ, എന്തായാലും ഞായറാഴ്ച അദ്ദേഹം കളിക്കില്ല. ” – മൈക്കൽ സ്റ്റാറെ പറഞ്ഞു.
അഞ്ച് പ്രതിരോധ താരങ്ങളാണ് കഴിഞ്ഞ മത്സരം കളിച്ചത്. ബ്ലാസ്റ്റേഴ്സിന്റെ മധ്യ നിര ഉറപ്പില്ലാത്തതാണോ ഈ നീക്കം എന്ന ചോദ്യത്തിന്, ടീം ഇനിയും മെച്ചപ്പെടേണ്ടതുണ്ടെന്നും, ഒരു പ്രേത്യേക കാര്യം മാത്രമായല്ല ഫുട്ബോൾ മത്സരത്തിൽ നിന്നും കണ്ടെത്താൻ സാധിക്കുന്നത് എന്നും അദ്ദേഹം സൂചിപ്പിച്ചു.
