ഏഷ്യൻ കബഡി ചാമ്പ്യൻഷിപ്പ്: ജപ്പാനെ തകർത്ത് ഇന്ത്യ അപരാജിത കുതിപ്പ് തുടരുന്നു

 

ബുധനാഴ്ച നടന്ന ഏഷ്യൻ കബഡി ചാമ്പ്യൻഷിപ്പിൽ 62-17ന് ജപ്പാനെ തോൽപ്പിച്ച് ഇന്ത്യൻ പുരുഷ കബഡി ടീം തുടർച്ചയായ മൂന്നാം വിജയം രേഖപ്പെടുത്തി.

ചൊവ്വാഴ്ച കൊറിയയ്‌ക്കെതിരെ മികച്ച അരങ്ങേറ്റം കുറിച്ച അസ്ലം ഇനാംദാർ ടൂർണമെന്റിലെ തന്റെ രണ്ടാമത്തെ സൂപ്പർ 10 നേടി, മത്സരത്തിലെ ടോപ് സ്‌കോററായി. പ്രതിരോധത്തിൽ ഇന്ത്യയുടെ ചുമതല പർവേഷ് ഭൈൻവാൾ നയിച്ചു. രണ്ട് വീതം ജയം നേടിയാണ് ഇന്ത്യയും ജപ്പാനും കളത്തിലിറങ്ങിയത്.

ചൊവ്വാഴ്ച ഹോങ്കോങ്ങിനെതിരെ 85-11 ന് നിഷ്‌കരുണം വിജയിക്കുകയും നേരത്തെ കൊറിയയെ 45-18 ന് പരാജയപ്പെടുത്തുകയും ചെയ്ത ജപ്പാൻ ഇന്ത്യൻ കബഡി ടീമിനെതിരെ ഉത്തരം കണ്ടെത്തുന്നതിൽ പരാജയപ്പെട്ടു.

ഓരോ പകുതിയിലും മൂന്ന് വീതം ആറ് ഓൾഔട്ടുകളാണ് ഇന്ത്യ ജപ്പാനെ വീഴ്ത്തിയത്. നാലാം മിനിറ്റിൽ നിലവിലെ ചാമ്പ്യൻമാർ അവരുടെ ആദ്യ ഓൾഔട്ടും 18-0 ലീഡിലേക്ക് എത്തിയപ്പോൾ എട്ടാം മിനിറ്റിൽ ജപ്പാൻ അക്കൗണ്ട് തുറന്നു. ആദ്യ പകുതി അവസാനിച്ചത് 32-6 എന്ന സ്‌കോറിന് ഇന്ത്യക്ക് അനുകൂലമായിട്ടാണ്. ആദ്യ പകുതിയിൽ ആറ് പോയിന്റുമായി ക്യാപ്റ്റൻ പവൻ സെഹ്‌രാവത്താണ് ഇന്ത്യയുടെ ടോപ് റൈഡർ. രണ്ടാം പകുതിയിൽ ഭേദപ്പെട്ട പ്രകടനം പുറത്തെടുത്ത ജപ്പാൻ അവസാനം അതിവേഗ പോയിന്റുകൾ നേടി. എന്നാൽ കബഡി മത്സരത്തിൽ 45 പോയിന്റിന്റെ മാർജിനിൽ ഇന്ത്യ വിജയിച്ചു.