ലിവര്‍പൂളിനോട് തോറ്റത് മൂന്നു ഗോളിന് ; അയാക്സ് ചാമ്പ്യന്‍സ് ലീഗില്‍ നിന്ന് പുറത്തേക്ക്
ബുധനാഴ്ച അയാക്‌സിനെതിരെ 3-0ന് വിജയിച്ച ലിവർപൂൾ ചാമ്പ്യൻസ് ലീഗ് നോക്കൗട്ട് ഘട്ടത്തിൽ സ്ഥാനം ഉറപ്പിച്ചു.പ്രീമിയർ ലീഗ് പട്ടികയിൽ ഏറ്റവും താഴെ കിടക്കുന്ന നോട്ടിംഗ്ഹാം ഫോറസ്റ്റിനോട് 1-0 ന് തോൽവി ഏറ്റുവാങ്ങിയ ലിവര്‍പൂള്‍ പല സംശയങ്ങളോടെ ആണ് മത്സരത്തിനു ഇറങ്ങിയത്.
തുടക്കം മുതല്‍ക്കേ മികച്ച രീതിയില്‍ ലിവര്‍പൂളിനെ നേരിട്ട അയാക്സ് പലപ്പോഴും ഇംഗ്ലീഷ് ടീമിനെ സമ്മര്‍ദത്തിലേക്ക് തള്ളി വിട്ടു.42 ആം മിനുട്ടില്‍ സല നേടിയ ഗോളോടെ ക്ലോപ്പിനും സംഘത്തിനും കൂടുതല്‍ കരുത്ത് ലഭിച്ചു.ആക്രമണത്തില്‍ കൂടുതല്‍ മൂര്‍ച്ച പുറത്തെടുത്ത റെഡ്സ് രണ്ടാം പകുതി തുടങ്ങി ആറു മിനുട്ടിനുള്ളില്‍ തന്നെ രണ്ടു ഗോളുകള്‍ നേടി.ഡാര്‍വിന്‍ നൂനസ്,ഹാര്‍വി എലിയട്ട് എന്നിവര്‍ ആണ് ലിവര്‍പൂളിനു വേണ്ടി രണ്ടും മൂന്നും ഗോള്‍ നേടിയത്.തോല്‍വിയോടെ ഗ്രൂപ്പില്‍ മൂന്നാം സ്ഥാനത് തുടരുന്ന അയാക്സിനു ചാമ്പ്യന്‍സ് ലീഗ് നോക്കൌട്ടിലേക്ക് ഇനി കടക്കാന്‍ പറ്റില്ല.ബാഴ്സ,അത്ലറ്റിക്കോ എന്നീ പ്രമുഖ ടീമുകള്‍ക്കൊപ്പം അയാക്സും യൂറോപ്പ്യന്‍ ലീഗ് കളിച്ചേക്കും.
