258 പന്തുകൾ നീണ്ടു നിന്ന അശ്വിന്റെയും വിഹാരിയുടെയും പോരാട്ടം ഇന്ത്യൻ ക്രിക്കറ്റ് ചരിത്രത്തിലേക്കാണ് നടന്നു കയറുന്നത്. ടെസ്റ്റ് ക്രിക്കറ്റിന്റെ സൗന്ദര്യം ഇത്തരം ദിവസങ്ങളാണ് .ഒരൊറ്റ വിക്കറ്റിന് വേണ്ടി നിരന്തരം ആക്രമിക്കുന്ന ബൗളർമാരും പരുക്കുകളെ പോലും അവഗണിച്ചു അവരെ ചെറുത്ത് നിൽക്കുന്ന ബാറ്റ്‌സ്മാന്മാരും തമ്മിലുള്ള പോരാട്ടം . പാറ്റ് കമ്മിൻസും ജോഷ് ഹേസൽ വുഡും അഴിച്ചു വിട്ട ബൗൺസർ ബാരേജിനെയും ഓസീസ് ഫീൽഡർമാരുടെ വെർബൽ വോളികളെയും അതിജീവിച്ചു കൊണ്ട് അശ്വിനും വിഹാരിയും നയിച്ച പോരാട്ടം 2021 ലെ മറക്കാൻ കഴിയാത്ത ദൃശ്യങ്ങളിൽ ഒന്നാകുമെന്നതിൽ ആർക്കാണ് സംശയം .ഓസ്‌ട്രേലിയൻ ടീമിന്റെ എന്ത് വില കൊടുത്തും ജയിക്കാനുള്ള വന്യമായ തൃഷ്ണയും അവസാന പന്ത് വരെ ആക്രമിക്കാനുള്ള ആറ്റിറ്റ്യുഡുമാണ് ഈ അഞ്ചാം ദിവസത്തെ ഇത്ര ആവേശകരമാക്കിയത് .ഒരിക്കൽ പോലും തീക്ഷ്ണത കുറക്കാതെ പേസ് ബൗളർമാരും ഫീൽഡർമാരും അഴിച്ചു വിട്ട റിലന്റ് ലസ് അറ്റാക്ക് . മിച്ചൽ സ്റ്റാർക്കിനു മൂർച്ഛയില്ലാതിരുന്നത് ഇന്ത്യൻ ബാറ്റ്‌സ്മാൻമാരെ കുറച്ചു സഹായിച്ചിരുന്നു എങ്കിൽ പോലും ഐതിഹാസികമായ ഒരു സമനിലയാണിത് .