ഇന്ത്യൻ ടീമിന്റെ ചീഫ് സെലക്ടേഴ്സ് ലിസ്റ്റിൽ അജിത് അഗാർക്കറും

എം എസ് കെ പ്രസാദിനു പകരക്കാരനായി ഇന്ത്യ ക്രിക്കറ്റ് ടീമിന്റെ ചീഫ് സെലക്ടറാവാനായി നാലു പേരെ ബി സി സി ഐ ഷോർട്ട് ലിസ്റ്റ് ചെയ്തതായാണ് റിപ്പോർട്ടുകൾ. മുൻ ഇന്ത്യൻ ബൗളർ അജിത് അഗാർക്കറാണ് സാധ്യതാ ലിസ്റ്റിൽ മുന്നിലുള്ളത്. അഗാർക്കറെക്കൂടാതെ വെങ്കിടേഷ് പ്രസാദ്, ലക്ഷ്മൺ ശിവരാമകൃഷണൻ, രാജേഷ് ചൗഹാൻ എന്നിവരും ലിസ്റ്റിലുണ്ട്‌.

ഇവർ നാലു പേരെയും ക്രിക്കറ്റ് അഡ്വൈസറി കമ്മിറ്റി ഇന്റർവ്യൂ ചെയ്യും. മദൻ ലാൽ, റുദ്ര പ്രതാപ്, സുലക്ഷന എന്നിവരുടെ ഉപദേശം അനുസരിച്ചാകും ബി സി സി ഐ അന്തിമ തീരുമാനം എടുക്കുക. ദക്ഷിണാഫ്രിക്കയ്ക്കെതിരെ നടക്കുന്ന ഏകദിന പരമ്പരയാകും പുതിയ സെലക്ടറുടെ ആദ്യ ഉത്തരവാദിത്വം. ഫെബ്രുവരി അവസാന വാരത്തോടെ നിയമനം ഉണ്ടാകുമെന്നാണ് റിപ്പോർട്ടുകൾ.