ഈയാഴ്ചത്തെ വമ്പൻ പോരാട്ടം ഏത് എന്ന ചോദ്യത്തിന് രണ്ട് ഉത്തരം ഇല്ല. അത് മഞ്ചസ്റ്ററിൽ യുണൈറ്റഡും സിറ്റിയും തമ്മിലുള്ള പോരാട്ടം തന്നെ. സിറ്റിയുടെ ഇത്തിഹാദ് സ്റ്റേഡിയത്തിൽ നാളെ രാത്രി 11 മണിക്ക് മത്സരം തുടങ്ങുമ്പോൾ സിറ്റിക്ക് തന്നെയാകും മുൻതൂക്കം. തോറ്റാൽ സിറ്റിക്ക് പ്രീമിയർ ലീഗ് കിരീടം നിലനിർത്തുക എന്ന സ്വപ്നം എന്നെന്നേക്കുമായി മറക്കാം.

മറുവശത്ത് യുണൈറ്റഡ് രണ്ടും കൽപ്പിച്ചാണ്. അവർക്കിനി നഷ്ടപ്പെടാൻ ഒന്നുമില്ല. ഒലെ ഗുണ്ണർ സോൾസ്ജറിൽ ഇപ്പോഴും വിശ്വാസം അർപ്പിക്കുന്നു യുണൈറ്റഡ് കളിക്കാരും ആരാധകരും. മാർകസ് റാഷ്ഫോർഡ് ഫോമിലേക്ക് തിരിച്ചുവന്നിരിക്കുന്നു. ഫ്രെഡ് ഒരു അപ്രതീക്ഷിത പോരാട്ടവീര്യത്തിൽ ആണ്. പോഗ്ബയുടെ പരിക്കിൽ നിന്നുള്ള തിരിച്ചുവരവ് പൂർണ്ണമായി തള്ളിക്കളയാൻ പറ്റില്ല. എന്നു  മാത്രവുമല്ല, ഈ സീസണിൽ മാഞ്ചസ്റ്റർ യുണൈറ്റഡ് കരുത്തു തെളിയിച്ചത് എല്ലാം മുൻനിര ക്ലബ്ബുകളോട് മാത്രമാണ്. ചെറുകിട ക്ലബ്ബുകളുടെ മുന്നിൽ തോൽക്കുമ്പോഴും ചെൽസി ലിവർപൂൾ ടോട്ടൻഹാം മുതലായ മുൻനിര കാരോട് യുണൈറ്റഡ് കട്ടക്ക് പിടിച്ചുനിൽക്കും.

മറുവശത്ത് സിറ്റി കുതിക്കാൻ ശ്രമിക്കുമ്പോൾ എല്ലാം അപ്രതീക്ഷിത തിരിച്ചടികൾ ലഭിക്കുന്നു. ലപ്പോർട്ടയുടെ പരിക്ക് ഡിഫൻസിൽ തീർത്ത വിള്ളൽ ഇതുവരെ അടയ്ക്കാൻ കഴിഞ്ഞിട്ടില്ല. ശക്തമായ കൗണ്ടർ അറ്റാക്കുകളിൽ അവർ പതറി പോകുന്നു. എന്നാലും കെവിൻ ഡിബ്റുയനെ, ഡേവിഡ് സില്‍വ ബെർണാഡോ സിൽവ, മെഹറസ് എന്ന് മധ്യനിരക്കാരും, സ്റ്റെർലിംഗ്, അഗ്വേറോ, ഗബ്രിയേൽ ജീസസ് എന്ന മുൻനിരക്കാരും മിന്നും ഫോമിലാണ്. സിറ്റി ഈ മത്സരം വിജയിക്കുമെന്ന് തന്നെയാണ് 90 ശതമാനം കളി വിദഗ്ധരും പ്രതീക്ഷിക്കുന്നത്.