സംസ്ഥാന സ്കൂള്‍ കായികമേള: പാലക്കാട് ഒന്നാമത്
കണ്ണൂര്‍: അറുപത്തിമൂന്നാമത് സംസ്ഥാന സ്കൂള്‍ കായികമേളയിൽ മൂന്നാം ദിവസം പാലക്കാട് എറണാകുളത്തെ പിന്നിലാക്കി. രണ്ടാം ദിവസം അവസാനിച്ചപ്പോൾ എറണാകുളം ആയിരുന്നു മുന്നിൽ. എന്നാൽ മൂന്നാം ദിവസം പാലക്കാട് അവരുടെ തേരോട്ടം വീണ്ടും ആരംഭിച്ചു. ജൂനിയര്‍ ആണ്‍കുട്ടികളുടെ അ‍ഞ്ച് കിലോമീറ്റര്‍ നടത്തത്തില്‍ പാലക്കാട് ഒന്നാമതെത്തി. സീനിയര്‍ പെണ്‍കുട്ടികളുടെ 3000 മീറ്റര്‍ നടത്തത്തില്‍ കോഴിക്കോടും ഒന്നാം സ്ഥാനം നേടി. പാലക്കാടിൻറെ പ്രവീണ്‍ ആണ് അ‍ഞ്ച് കിലോമീറ്റര്‍ നടത്തത്തില്‍ സ്വർണം നേടിയത്. നന്ദന ശിവദാസ് ആണ് പെണ്‍കുട്ടികളുടെ 3000 മീറ്റര്‍ നടത്തത്തില്‍ മീറ്റ് റെക്കോര്‍ഡോടെ സ്വര്‍ണം നേടിയത്.
ഒറ്റ പോയിന്റില്‍ ആയിരുന്നു എറണാകുളം ഇന്നലെ മുന്നിൽ എത്തിയത്. ഇന്നലെ സബ്‌ ജൂനിയര്‍ ആണ്‍കുട്ടികളുടെ ഡിസ്‌കസ്‌ ത്രോയില്‍ കാസര്‍കോട്‌ കുട്ടമത്ത്‌ ജിഎച്ച്‌എസ്‌എസിന്റെ കെ സി സെര്‍വാന്‍ പുതിയ മീറ്റ് റെക്കോഡ് നേടി. 14 വര്ഷം പഴക്കമുള്ള റെക്കോഡ് ആണ് ഇന്നലെ തിരുത്തിയത്. ഇന്ന് 100 മീറ്റര്‍ ഹര്‍ഡില്‍സ് ഫൈനലും,4×100 മീറ്റര്‍ റിലേയുമാണ് പ്രധാനം മത്സരം.
