മഞ്ചസ്റ്റർ യുണൈറ്റഡിന്റെ ദുരിതങ്ങൾക്ക് അറുതി വരുന്നില്ല. ലണ്ടൻ സ്റ്റേഡിയത്തിൽ ആതിഥേയരായ വെസ്റ്റ് ഹാം യുണൈറ്റഡിനോട് എതിരില്ലാത്ത രണ്ട് ഗോളുകൾക്ക് അവർ പരാജയപ്പെട്ടു. ഇതോടെ ആറു മത്സരങ്ങളിൽ രണ്ട് ജയം രണ്ട് സമനില രണ്ടു പരാജയം എന്നിവയുമായി മഞ്ചസ്റ്റർ യുണൈറ്റഡ് എട്ട് പോയിൻറ് സമ്പാദിച്ചു. നാല്പ്പത്തി നാലാം മിനിറ്റിൽ ആന്ദ്രേ യാർമലെന്കോ എൺപത്തിനാലാം മിനിറ്റിൽ ആരോൺ ക്രെസ്വെൽ എന്നിവരാണ് യുണൈറ്റഡിനെ തകർത്ത് ഗോളുകൾ നേടിയത്.

         പരിക്ക് വളരെയധികം അലട്ടിയ യുണൈറ്റഡ് ടീമിനെ കൂടുതൽ ദുരിതത്തിലാക്കി കൊണ്ട് സ്റ്റാർ സ്ട്രൈക്കർ മാർക്കസ് റാഷ്ഫോർഡും പരിക്കിനെ പിടിയിൽ അകപ്പെട്ടു. പരിക്കിന്റെ കാഠിന്യം വ്യക്തമല്ല. എന്നാൽ അടുത്ത ആഴ്ച ആർസനലിന് നേരിടും മുമ്പ് യുണൈറ്റഡ് നിരയിൽ ഏതെങ്കിലും പ്രമുഖ താരങ്ങൾ തിരിച്ചെത്തേണ്ടിയിരിക്കുന്നു.

          വിജയത്തോടെ വെസ്റ്റ്ഹാം പോയിൻറ് പട്ടികയിൽ നാലാമത് എത്തി. അവരുടെ മാനേജർ മാനുവൽ പെലഗ്രീനി മാഞ്ചസ്റ്റർ യുണൈറ്റഡിന്റെ  നാല് വ്യത്യസ്ത മാനേജർമാരെ പരാജയപ്പെടുത്തിയ ഏക മാനേജർ എന്ന റെക്കോർഡിന് ഉടമയായി. ആദ്യം ഡേവിഡ് മോയ്സ്, പിന്നെ ലൂയിസ് വാൻ ഗാൽ, ഹോസെ മൊറിഞ്ഞോ ഇപ്പോൾ ഒലെ ഗുണ്ണർ സോൾസ്ജർ.