വിയറ്റ്‌നാം ഓപ്പണ്‍ ബാഡ്മിന്റണിൽ സൗരഭ് വര്‍മ്മ ഫൈനലില്‍
ഇന്ത്യൻ താരം സൗരഭ് വർമ്മ വിയറ്റ്‌നാം ഓപ്പണ്‍ ബാഡ്മിന്റണിൻറെ ഫൈനലിൽ പ്രവേശിച്ചു. ഇന്നലെ നടന്ന മത്സരത്തിൽ പുരുഷവിഭാഗം സിംഗിള്‍സ് സെമിയിൽ ജപ്പാൻ താരം മിനോരു കോഗയെ ആണ് തോൽപ്പിച്ചത്. നേരിട്ടുള്ള സെറ്റുകൾക്കായിരുന്നു വിജയം. തകർപ്പൻ മൽസരമാണ് രണ്ട് താരങ്ങളും കാഴ്ചവെച്ചത്. കഴിഞ്ഞ മാസം ഹൈദരാബാദ് ഓപ്പൺ ജേതാവായ സൗരഭ് 51 മിനിറ്റ് നീണ്ട് നിന്ന മത്സരത്തിനൊടുവിലാണ് വിജയം സ്വന്തമാക്കിയത്. ഫൈനലില്‍ ചൈനയുടെ സുന്‍ ഫീ സിയാങ് ആണ് സൗരഭിൻറെ എതിരാളി.
തുടക്കത്തിൽ തന്നെ സൗരഭ് 0-4 ന് പിന്നിലായിരുന്നു, എന്നാൽ ഇടവേളയിൽ 11-9 എന്ന നേട്ടം സ്വന്തമാക്കാൻ ഇന്ത്യൻ താരത്തിന് കഴിഞ്ഞു. ആദ്യ മത്സരത്തിൽ രണ്ട് പേരും ഒപ്പത്തിനൊപ്പം ആയിരുന്നു. എന്നാൽ രണ്ടാം മത്സരത്തിൽ സൗരഭ് ആക്രമണം പുറത്തെടുത്തതോടെ മിനോരുവിന് പിടിച്ചുനിൽക്കാൻ കഴിഞ്ഞില്ല.
സ്‌കോര്‍: 22-20, 21-15
