ദബാംഗ് ദില്ലി കെ.സി ജയ്പൂർ പിങ്ക് പാന്തേഴ്സിനെ തോൽപ്പിച്ചു

പ്രൊ കബഡി ലീഗിൽ ദബാംഗ് ദില്ലിയുടെ കുതിപ്പ് തുടരുന്നു. ഈ സീസണിലെ പത്താം  ജയം ആണ് ഇന്നലെ നേടിയത്. ഇന്നലെ നടന്ന മത്സരത്തിൽ ജയ്പൂർ പിങ്ക് പാന്തേഴ്സിനെ 46-44 എന്ന സ്കോറിലാണ് ദില്ലി തോൽപ്പിച്ചത്. സൂപ്പർ സ്റ്റാർ റൈഡർ നവീൻ കുമാർ തുടർച്ചയായ പത്താമത്തെ സൂപ്പർ 10 പൂർത്തിയാക്കി. നവീൻറെ മികച്ച പ്രകടനത്തിലാണ് ദില്ലി വിജയം സ്വന്തമാക്കിയത്.ദബാംഗ് ദില്ലി കെ.സി. അഞ്ച് പോയിന്റ് സൂപ്പർ റെയ്ഡ് നേടിയാണ് മത്സരം ആരംഭിച്ചത്. ആദ്യം തന്നെ തകർപ്പൻ പ്രകടനം നടത്തിയ ദില്ലി 6-0 എന്ന ലീഡ് നേടി. മൽസരം തുടങ്ങി നാലാം മിനിറ്റിൽ ദില്ലി ജയ്പൂർ പിങ്ക് പാന്തേഴ്സിനെ ഓൾഔട്ടാക്കി. എന്നാൽ ഈ ഓൾഔട്ടിന് ശേഷമാണ് ജയ്പൂർ പിങ്ക് പാന്തേഴ്സ് കളിക്കാൻ തന്നെ ആരംഭിച്ചത്. ദീപക് ആണ് ജയ്പൂർ പിങ്ക് പാന്തേഴ്സിന് പോയിന്റുകൾ നേടി കൊടുത്തത്. പിന്നീട് കളിയിലേക്ക് ശക്തമായ തിരിച്ചുവരവ് നടത്തിയ ജയ്പ്പൂർ ഒന്നാം പകുതി അവസാനിക്കുന്നതിന്  മുമ്പ് ദില്ലിയെ ഓൾഔട്ടാക്കി. പിന്നീട് ഇരു ടീമുകളും ആക്രമിച്ചു കളിച്ചു. ഒന്നാം പകുതി അവസാനിച്ചപ്പോൾ ദില്ലി(21-19) ലീഡ് നേടി.

എന്നാൽ രണ്ടാം പകുതിയിൽ ദില്ലിക്ക് അത്ര ശോഭിക്കാൻ കഴിഞ്ഞില്ല. ജയ്പ്പൂർ പതുക്കെ പോയിന്റുകൾ നേടുകയും ദില്ലിയെ രണ്ടാം തവണ ഓൾഔട്ടാക്കുകയും ചെയ്തു. എന്നാൽ മത്സരം അവസാനിക്കാൻ എട്ട് മിനിറ്റ് ബാക്കി നിൽക്കെ സൂപ്പർ താരം നവീൻ തകർപ്പൻ പ്രകടനം നടത്തുകയും ജയ്പ്പൂരിനെ ഓൾഔട്ടാക്കുകയും ചെയ്തു. നവീൻറെ ഈ ആക്രമണത്തിൽ തകർന്നുപോയ ജയ്‌പ്പൂരിന് തിരിച്ച് മത്സരത്തിലേക്ക് എതാൻ സാധിച്ചില്ല. അങ്ങനെ രണ്ട് പോയിന്റ് വ്യത്യാസത്തിൽ ദിലി വിജയം സ്വന്തമാക്കി.