പ്രൊ കബഡി ലീഗ്: അഞ്ചാം ജയവുമായി ദബാംഗ് ഡൽഹി
വിവോ പ്രോ കബഡി ലീഗിൽ ഇന്നലെ നടന്ന രണ്ടാം മത്സരത്തിൽ രണ്ട് പോയിന്റിന് ഡൽഹി പൂനേരി പള്‍ടാനെ തോൽപ്പിച്ചു. അവസാന നിമിഷം വരെ നീണ്ട് നിന്ന ത്രില്ലർ ആയിരുന്നു ഇന്നലത്തെ മത്സരം. 32-30 എന്ന സ്കോറിനാണ് ദബാംഗ് ഡൽഹി പൂനേരിയെ തോൽപ്പിച്ചത്. നവീൻ കുമാർ വീണ്ടും സൂപ്പർ 10 നേടി.
ആദ്യ പോയിന്റ് ഡൽഹി നേടിയെങ്കിലും നിതിൻ തോമറും ക്യാപ്റ്റൻ സുർജിത് സിങ്ങും പുനേരി പൽത്താന്റെ സ്‌കോറുകൾ സമനിലയിൽ എത്തിച്ചു. ഓരോ പോയിന്റുകൾ നേടിയാണ് ഇരു ടീമുകളും മത്സരം മുന്നോട്ട് കൊണ്ടുപോയത്‌. എന്നാൽ ആദ്യ പകുതി അവസാനിക്കാറായപ്പോൾ ഡൽഹി പൂനേരിയെ ഓൾഔട്ട് ആക്കി. അതിലൂടെ ആദ്യ പകുതിയിൽ 19-11 എന്ന സ്‌കോറിൽ ഡൽഹി ലീഡ് നേടി. എന്നാൽ രണ്ടാം പകുതിയിൽ പൂനേരി തകർപ്പൻ പ്രകടനം നടത്തി. നവീൻ കുമാർ അവസാന നിമിഷം തകർപ്പൻ പ്രകടനംനടത്തിയതോടെ വിജയം ദബാംഗ് ഡൽഹി സ്വന്തമാക്കി. പൂനേരിക്ക് വേണ്ടി നിതിൻ എട്ട് പോയിന്റ് നേടി. ജയത്തോടെ ഡൽഹി പോയിന്റ് നിലയിൽ ഒന്നാം സ്ഥാനത്തെത്തി.
