ഇനി വലിയ കളികൾ : ഇന്ത്യ വെസ്റ്റിൻഡീസ് ആദ്യ ഏകദിനം നാളെ
ഗയാന: ഇന്ത്യയുടെ വിൻഡീസ് പര്യടനത്തിലെ രണ്ടാം ഘട്ടം നാളെ ആരംഭിക്കും. ടി20 പരമ്പര തൂത്തുവാരിയ ഇന്ത്യ ഏകദിന പരമ്പരക്കായി തയ്യാറായി കഴിഞ്ഞു. ആദ്യ ഏകദിനം നാളെ ഗയാന പ്രൊവിഡൻസ് സ്റ്റേഡിയത്തിൽ ഇന്ത്യൻ സമയം രാത്രി ഏഴ് മണിക്ക് ആരംഭിക്കും. ടി20യിൽ നേടിയ വിജയം ആവർത്തിക്കാൻ കഴിയുമെന്ന ആത്മവിശ്വാസത്തിലാണ് ഇന്ത്യ. ടി20യിൽ ബാറ്റിങ്ങിലും, ബൗളിങ്ങിലും ഇന്ത്യക്ക് ഒരുപോലെ തിളങ്ങാൻ കഴിഞ്ഞിരുന്നു. എന്നാൽ ടി20യിൽ ഏറ്റ പരാജയം ഏകദിനത്തിലൂടെ വീട്ടാൻ ആകും വിൻഡീസ് ശ്രമിക്കുക.
വിൻഡീസ് ഏകദിന ടീമിൽ ഗെയിൽ കൂടി എത്തുന്നതോടെ ടീമിൻറെ ആത്മവിശ്വാസം കൂടും. ഗെയിലിന്റെ അന്താരാഷ്ട്ര ക്രിക്കറ്റ് മത്സരങ്ങൾക്ക് ഈ പരമ്പരയോടെ അവസാനമാവുകയാണ്. അതുകൊണ്ട് തന്നെ അവസാന പരമ്പര മികച്ചതാക്കാൻ ഗെയിൽ ശ്രമിക്കും. കൂറ്റൻ അടികളും, വലിയ ഇന്നിങ്‌സുകളും ഉണ്ടാകാൻ സാധ്യത ഉണ്ട്. ടി20 ടീമിൽ നിന്ന് കുറച്ച് വ്യത്യാസങ്ങളുമായാണ് ഇന്ത്യ ഏകദിന മത്സരത്തിന് ഇറങ്ങുന്നത്. കേദാര്‍ ജാദവ്, യുസ്വേന്ദ്ര ചഹല്‍, മുഹമ്മദ് ഷമി, കുല്‍ദീപ് യാദവ് എന്നിവർ ഏകദിന ടീമിൽ ഉണ്ട്. ചഹല്‍, കുല്‍ദീപ് എന്നിവരിൽ ആദ്യ ഏകദിനത്തിൽ ഒരാൾ മാത്രമെ കാണു.
