വെസ്റ്റ് ഇൻഡീസ് പര്യടനത്തിനുള്ള ഇന്ത്യൻ ടീമിനെ കോഹ്ലി നയിക്കും
മുംബൈ: വെസ്റ്റ് ഇൻഡീസ് പര്യടനത്തിനുള്ള ഇന്ത്യൻ ടീമിനെ ഇതിഹാസ താരം വിരാട് കോഹ്ലി തന്നെ നയിക്കും. വിൻഡീസിനെതിരായ ഏകദിന, ട്വന്റി-20, ടെസ്റ്റ് പരന്പരയ്ക്കുള്ള ഇന്ത്യൻ ടീമിനെ ചീഫ് സെലക്ടർ എം.എസ്.കെ. പ്രസാദ് ഇന്നലെ വൈകിട്ട് പ്രഖ്യാപിച്ചു. യുവതാരങ്ങൾക്ക് അവസരം നല്കിയാണു പര്യടനത്തിനുള്ള ടീമിനെ പ്രഖ്യാപിച്ചത്. അടുത്ത വർഷം ഓസ്ട്രേലിയയിൽ നടക്കുന്ന ട്വന്റി-20 ലോകകപ്പ് മുന്നിൽകണ്ടാണ് ടീം തെരഞ്ഞെടുപ്പ് നടന്നത്. എന്നാൽ ധോണിയെ ഒഴിവാക്കിയാണ് പര്യടനത്തിനുള്ള ടീമിനെ പ്രഖ്യാപിച്ചിരിക്കുന്നത്. ലോകകപ്പ് തോൽവിക്ക് ശേഷം അവധിയിലാണ് താരം.
മൂന്ന് വീതം ട്വന്റി-20യും, ഏകദിനങ്ങളും രണ്ട് ടെസ്റ്റും അടങ്ങുന്ന പരന്പര അടുത്തമാസം മൂന്നിനാണ് ആരംഭിക്കുക. രോഹിത് ശർമ ഏകദിന, ട്വന്റി-20 നായകൻ ആകുമെന്ന് അഭ്യൂഹമുണ്ടായിരുന്നു. ഹാർദിക് പാണ്ഡ്യക്ക് പരന്പരയിൽ പൂർണ വിശ്രമം അനുവദിച്ചപ്പോൾ ജസ്പ്രീത് ബുംറ ടെസ്റ്റിൽ മാത്രം ഉൾപ്പെട്ടു. എം.എസ്. ധോണി വിട്ടുനിന്നതിനെത്തുടർന്ന് ഋഷഭ് പന്ത് മൂന്ന് ഫോർമാറ്റിലും ഇടംനേടി.
