19-ാമത് ഏഷ്യൻ ഗെയിംസിന്റെ ഫുട്ബോൾ മത്സരത്തിനുള്ള ഇന്ത്യൻ ടീമിനെ പ്രഖ്യാപിച്ചു

 

സെപ്തംബർ 21 മുതൽ ഒക്ടോബർ 6 വരെ ചൈനയിലെ ഹാങ്ഷൗവിൽ നടക്കുന്ന 19-ാമത് ഏഷ്യൻ ഗെയിംസിന്റെ ഫുട്ബോൾ മത്സരത്തിനുള്ള 22 അംഗ ടീമിനെ ഇന്ത്യൻ സീനിയർ വനിതാ ടീം ഹെഡ് കോച്ച് തോമസ് ഡെന്നർബി പ്രഖ്യാപിച്ചു.

ഫിഫ റാങ്കിംഗിൽ 61-ാം സ്ഥാനത്തുള്ള ഇന്ത്യൻ വനിതാ ടീം, ഗ്രൂപ്പ് ബിയിൽ ചൈനീസ് തായ്‌പേയ് (38-ാം റാങ്ക്), തായ്‌ലൻഡ് (46-ാം റാങ്ക്) എന്നിവർക്കൊപ്പമാണ്.

17 ടീമുകളെ അഞ്ച് ഗ്രൂപ്പുകളായി തിരിച്ചിട്ടുണ്ട്. എ, ബി, സി ഗ്രൂപ്പുകൾക്ക് മൂന്ന് ടീമുകൾ വീതവും ഡി, ഇ ഗ്രൂപ്പുകൾക്ക് നാല് ടീമുകളും വീതമുണ്ട്. ഗ്രൂപ്പ് ജേതാക്കളായ അഞ്ച് പേരും രണ്ടാം സ്ഥാനം നേടുന്ന മൂന്ന് മികച്ച ടീമുകളും ക്വാർട്ടറിലേക്ക് യോഗ്യത നേടും.

ഏഷ്യൻ ഗെയിംസിലെ വനിതാ ഫുട്ബോൾ ടൂർണമെന്റ് പ്രായപരിധികളില്ലാതെ മുഴുവൻ സീനിയർ ദേശീയ ടീമുകളും തമ്മിൽ മത്സരിക്കുന്നു. ഇന്ത്യൻ വനിതാ ടീം മുമ്പ് രണ്ട് തവണ ഏഷ്യൻ ഗെയിംസിൽ പങ്കെടുത്തിട്ടുണ്ട് – ബാങ്കോക്ക് 1998, ഇഞ്ചിയോൺ 2014.

ഇന്ത്യൻ വനിതാ ഫുട്ബോൾ ടീം:

ഗോൾകീപ്പർമാർ: ശ്രേയ ഹൂഡ, സൗമിയ നാരായണസാമി, പന്തോയ് ചാനു.

ഡിഫൻഡർമാർ: ആശാലതാ ദേവി, സ്വീറ്റി ദേവി, റിതു റാണി, ദലിമ ചിബ്ബർ, അസ്തം ഒറോൺ, സഞ്ജു, രഞ്ജന ചാനു.

മിഡ്ഫീൽഡർമാർ: സംഗീത ബാസ്ഫോർ, പ്രിയങ്ക ദേവി, ഇന്ദുമതി കതിരേശൻ, അഞ്ജു തമാംഗ്, സൗമ്യ ഗുഗുലോത്ത്, ഡാങ്‌മെയി ഗ്രേസ്.

മുന്നേറ്റം: പ്യാരി സാക്സ, ജ്യോതി, രേണു, ബാലാ ദേവി, മനീഷ, സന്ധ്യ രംഗനാഥൻ. മുഖ്യ പരിശീലകൻ: തോമസ് ഡെന്നർബി.